Ginapasiguro ni Iloilo City Mayor Raisa Treñas nga indi maapektuhan ang mga pumuluyo sang syudad sa nationwide transport strike nga patigayunon buwas nga adlaw sang Martes, Abril 21, 2026.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga sa pagpatawag sang alkald sa Western Visayas Alliance of Transport Cooperatives and Corporations Inc. (WVATCCI), ginpasiguro sang grupo nga indi sila mag-upod sa strike kag magapadayon ang ila operasyon.
Ini nga alliance ang ginabug-usan sang 11 ka mga transport cooperative nga naga-operate man sa syudad sang Iloilo.
Ginpahayag man sang alkalde nga wala sang dapat kabalak-an bangud may mga modernized jeepneys nga magabyahe sa mga dalanon sang Iloilo City agud maserbisyuhan ang mga pasahero bisan pa may ara sang transport strike.
Padayon naman nga ginapriyoridad sang alcalde ang nagakaigo nga tikang agud nga indi tuman nga maapektuhan ang pumuluyo sa nasambit nga untat byahe sang mga transport cooperative.
