Gindagdagan ni Iloilo City Mayor Jerry Treñas sang cease and desist order ang Department of Public Works and Highways (DPWH) VI agud untaton ang nagapadayon nga road construction/concreting kag excavation sa Barangay. San Pedro, Jaro, Iloilo City.
Sa interview sang Bombo Radyo kay alyas Fer, residente sang nasambit nga Barangay, iya ginpahayag nga ginakalipay kuntani nila ang pagkay-o sang amo nga area bangud nga nagabaha ini kun magbubo ang mabaskog nga ulan kag makabulig sa paghagan-hagan sang lamok.
Suno kay Fer, nagapangayo naman sila sang bulig sa ila Punong Barangay kun ano ang pwedi nga himuon kun mapa-untat na ang pag-ubra sa amo nga dalan.
Nahibaluan sang City Engineer’s Office (CEO) nga non-compliant ang ahensya sa mga permits nga kinahanglan agud himuon ang proyekto, rason nga ginpadagdagan ni Mayor Treñas sang cease and desist order ang DPWH.
Nabutang sa cease and desist order nga wala sang excavation permit nga na-secure ang ahensya halin sa CEO, wala sang mayor’s permit, barangay permit, kag wala man sang may ginpasar nga ordinansa ang Iloilo City Council agud pasiraduhan ang portion sang dalan nga apektado sang proyekto.
Gintumod sa cease and desist order nga ginlapas sang ahensya ang Department Order No. 110 sang Department of Public Works and Highways (DPWH) ukon ang mandatory nga pag-conduct sang consultation ukon coordination sang mga impormasyon kag specifications sang proyekto sa local government unit.
Nagaguwa man nga non-compliant ang ahensya sa Commission on Audit Circular No. 2013-004 nga naga-require sa pagbutang sang tarpaulin signboard para sa information kag publicity sang amo nga proyekto.
Nagpaguwa man sang stoppage order ang CEO sa contractor sang nasambit nga proyekto.
