ILOILO CITY – “Very happy” kag “more than contented” ang ginbuy-an nga mga tinaga ni Iloilo City Mayor Jerry Treñas sa ginpatigayon nga Opening Salvo sang Dinagyang Festival 2020.
Sa interview sang Bombo Radyo kay Treñas, iya ginpahayag nga nasaksihan sang tumalan-aw ang level-up performance sang Barangay tribes kag School-based tribes nga magapakigbahin sa Dagyang sa Calle Real kag Dinagyang 360 degrees.
Suno kay Treñas, bisan wala sang bearing ang Opening Salvo apang kasubong nga nabatyagan ang highlights sang Dinagyang Festival sa diin nasaksihan ang arena type performance sang tagsa ka tribu.
Ginpahayag sang alkalde nga iya gid nga ginapanginbulahan ang Iloilo Festivals Foundation Incorporated nga amo ang nagadumala sa nasambit nga kahiwatan.
Samtang, tuman naman ang kalipay ni Iloilo Festivals Foundation Incorporated President Atty. Joebert Peñaflorida sa nangin performance sang tagsa ka tribu.
Suno kay Peñaflorida, nagbunga ang kabudlay sang tagsa ka tribu bangud sa pagpakita sang world class performance.
Ginpahayag ni Peñaflorida nga lauman nga sa Enero 25-26 ang mas manami performance nga amo ang pagabasehan kun sin-o ang magadaug.
