ILOILO CITY – Ginhatagan ni Iloilo City Mayor Jerry Treñas sang 6.5 nga rating ang iya performance bilang alkalde sa syudad.
Sa interview sang Bombo Radyo kay Treñas, iya ginpahayag nga madamo na sang nahimo ang iya administrasyon apang madamo man ang dapat pa nga hilimu-on.
Suno sa alkalde, dismayado siya sa pila ka mga departamento sa Iloilo City Hall.
Una diri amo ang Iloilo City Urban Poor Affairs Office kun sa diin, may ginpang-terminate nga empleyado sang damlag lang bangud sa ginapahayag anomaliya.
Pahayag sang alkalde, ang paghatag sang housing units ang paborito niya nga proyekto bangud nga madamo sang mga pigado ang nabuligan.
Ang ikaduha nga opisina nga dapat pa nga tutukan sang iya administrasyon amo ang Public Safety and Transportation Management Office bangud sang madamo nga reklamo batuk sa mga traffic enforcers.
Suno kay Treñas, nagaplano ini nga i-professionalize ang nasambit nga opisina apang dako nga panghangkat ang kakulang sang budget.
Dismayado man ang alkalde sa issue sang kurapsyon sa Iloilo City Government Employees Multi- Purpose Cooperative.
Amat-amat naman nga naga-improve suno sa alkalde ang Beautification Division sa idalom sang bag-o nga pamunuan.
Sa pihak sang mga issue nga ginapangatubang sang iya administrasyon, ginpahayag niya nga dapat nga mangin proud ang mga Ilonggo sa nalab-ot na sang syudad.
Adlaw-adlaw suno sa iya, madamo ang nagapakig-angut sa iya kag nagadayaw sa matahom nga syudad sa idalom sang iya pagpamuno.
Samtang, sa Agosto 16, patigayunon ang State of the City Address sa Plaza Libertad kun sa diin, iplastar niya ang mga nahimo na sang iya administrasyon kag ang mga plano sang syudad sa masunod nga mga tinuig.
Imbitado ang tanan nga mga konsehal, mga department heads, ang business community, kag ang mga barangay officials.
