Ginpakakas na ni Iloilo City Mayor Raisa Treñas ang iya litrato kag slogan sa puertahan sang Atipan Center sa 7th floor sang Iloilo City Hall.
Ini kasunod man sa pagpapanaog sang Department of Interior and Local Government (DILG) Memorandum 2026-006 sang nagligad nga Enero 29 angot sa anti-epal policy.
Ini agud nga mapasiguro nga wala sang ngalan, litrato, logo, initials, color motif, slogan ukon bisan ano nga identifying symbol sang public official ang makit-an sa mga signage, marker, tarpaulin kag iban pa nga materyales nga ginbayaran sang pondo sang gobyerno.
Sa interview sang Bombo Radyo kay Joy Fantilaga-Gorzal, spokesperson ni Iloilo City Mayor Raisa Trenas, iya ginpahayag nga nakatalana man nga magpapanaog sang memorandum sa tanan nga opisina agud nga mapatuman sang maayo kag mapakakas na ang mga pangalan sang mga politiko sa mga proyekto.
Nagpadala man sang sulat si Treñas sa opisina nga in-charge sa programa kag proyekto sang siudad nga nagamando nga likawan na ang pagbutang sang mga pangalan sang mga opisyal sa ano man nga mga materyales kag istruktura.
Suportado naman ni Congresswoman Julienne “Jam-Jam” Baronda ang Anti-Epal Drive kun sa diin nagpahayag ini nga maayo gid ini nga pagsulundan kag gindayaw pa ang DILG.
Nahibaluan nga sa iya opisina, ginpangkakas naman ang pila ka mga litrato kag slogan sini.
Ginpadal-an naman sang sulat ni Baronda ang Department of Public Works and Highways (DPWH) nga i-check ang mga proyekto ukon buildings kag kun may pangalan sini ukon litrato, gilayon ini nga ipakakas.
