ILOILO CITY – Ginkakibot ni Iloilo City Mayor Jerry Treñas ang pagkaguba sang mga salakyan kag mga pulungku-an nga propidad sang Iloilo City Mayor.
Sa interview sang Bombo Radyo kay Mayor Treñas, iya ginpahayag nga ang Mayor’s Car lakip na ang back-up car ang lunsay mga guba kag kinahanglan pa niya nga ipakaayo.
Magluwas sa mga salakyan, ginkakibot man ni Treñas nga guba kag wala na sang foam ang 23 ka bilog nga executive chair sa conference area sa City Mayor’s Office.
Indi naman mahangpan sang alkalde kun nga-a lunsay guba ang propidad kag wala ginpakaayo sang nakaligad nga administrasyon.
Samtang, suno naman kay Mr. Joren Sartorio, pinuno sang General Services Office (GSO), indi niya makumpirma kun hungod nga ginguba ukon naguba lamang ang mga salakyan kag ang mga pulungku-an sa conference room.
Ginpahayag ni Sartorio nga indi man madali nga maguba ang pulungku-an nga malahalon magluwas lamang kun nagkupos na ang foam sini.
Kun hungod nga ginguba, ginpahayag ni Sartorio nga kinahanglan nga magpatigayon sang imbestigasyon.
Sa subong, ang mahimo sang Iloilo City Government nga remedyo amo ang pagpakaayo sang mga pulungku-an sa diin ginabanta nga magalab-ot sa P50,000 ang balor sang repair sini.
