𝗜𝗟𝗢𝗜𝗟𝗢 𝗖𝗜𝗧𝗬 – Ginkalipay ni Iloilo City Mayor Jerry Treñas ang pag-appoint ni Pope Francis kay Cebu Auxiliary Bishop Midyphil Billones bilang bag-o nga arsobispo sang Jaro nga amo ang nagbulos kay retired Archbishop Most Reverend Jose Romeo O. Lazo, D.D.
Si Billones nga naga-edad 55-anyos amo na ang mangin ika-14 nga archbishop sang Jaro nga nagasakop sa syudad kag probinsya sang Iloilo amo man sa probinsya sang Guimaras.
Sa interview sang Bombo Radyo kay Treñas, iya ginpahayag nga madugay na sila nga mag-abyan ni Billones.
Suno kay Treñas, madumduman pa sini nga nakaagi misa si Billones sa Iloilo City Hall.
Nagapati man ang alkalde nga mangin maayo nga arsobispo sang Jaro si Billones kun basehan ang iya background.
Nahibaluan nga apisar nabun-ag sa Panay, Capiz, malawig ang pagtinir ni Billones sa Iloilo City.
Nagtuon siya sang Philosophy sa St. Vincent Ferrer Seminary sa Iloilo City kag Theology sa Loyola School of Theology sa Quezon City kun sa diin nakuha sini ang master s degree sa amo man nga program.
Na-ordenahan siya bilang pari sa Archdiocese of Jaro sang Oktubre 2, 1995 ukon halos tatlo ka dekada na ang nagligad.
Lain-lain man nga posisyon ang gintungdan sini sa simbahan lakip na ang pagpungko bilang personal secretary kanday Archbishop Alberto Piamonte kag Archbishop Angel Lagdameo.
Sang Hulyo 2019, nagaserbe pa sadto si Billones bilang rector sang St. Joseph Regional Seminary of Jaro sang gin-appoint siya sang Santo Papa bilang auxiliary bishop sang Cebu.
Na-ordenahan siya sa episcopate sang Agusto 27, 2019 diri man sa Jaro Cathedral.
