Ginpanginwala ni Iloilo City Mayor Jerry Treñas ang nagalapta nga fake news may kaangtanan sa patigayunon sang syudad nga candle lighting kag prayers para kay former President Rodrigo Duterte.
Sa interview sang Bombo Radyo kay Mayor Treñas, iya ginpahayag nga ang nagalapta nga facebook post nga nagapahayag sang nasambit nga kahiwatan ang wala sang kamatuoran.
Suno kay Treñas, bisan isa sa mga empleyado sang Iloilo City Hall ang wala nagtambong sa ano man nga kahiwatan nga nagasuporta sa anay presidente.
Gin-athag man sini nga nagahatag sang permit ang syudad sa mga ginapatigayon nga protesta ukon pagtililipon kon wala lang man ini nagatuga sang gamo.
Nagapati man ang alkalde nga may due process nga gina-apply kay Duterte kag may ikasarang ang International Criminal Court nga magpatuman sang patas nga pagbusisi sa kaso sini nga crime against humanity.
Nagpangabay man ang natungdan sa publiko nga likawan ang pagpaguwa sang mga impormasyon nga indi verified agud indi na magsangkad pa ang fake news.
