𝗜𝗟𝗢𝗜𝗟𝗢 𝗖𝗜𝗧𝗬 — Nagaduha-duha sa gihapon si Iloilo City Mayor Jerry Treñas kon sea wall gidman ang ginapatukod sang Department of Public Works and Highways (DPWH) Region 6 sa Barangay Rizal Pala-Pala 1, 2, kag Barangay Estanzuela, Iloilo City.
Sa interview sang Bombo Radyo kay Treñas, iya ginpahayag nga apisar nga nagaduda ini sa sea wall, pahanugotan sini sa gihapon nga mapadayon sang kontraktor nga mahuman ang amo nga proyekto.
Suno kay Treñas, siguradohon lamang sang ahensya nga mapasa ang tanan nga rekisitos nga kinahanglan sang city government agud nga magasunod sa legal nga proseso ang tanan.
Gin-athag man sini nga wala sang pagpamulutika ang pagpauntat niya sang proyekto bangud bilang isa ka alkalde, nagasunod lamang siya sa layi.
Nahibaluan nga ginpauntat ni Treñas ang pagpatukod sang sea wall bangud ang Department of Public Works and Highways (DPWH) Region 6 ang wala makakuha sang permit halin sa City Government, City Environment and Natural Resources Office, Philippine Ports Authority, kag Philippine Reclamation Authority agud magpatukod sang nasambit nga proyekto.
Sa subong, yara na sila sa 70% ang completion sang amo nga proyekto.
