Ginpakakas na ni Iloilo City Mayor Raisa Treñas ang mga “unnecessary graphics” kaangay sang “Uswag Ilonggo”, Rise Iloilo kag iban pa nga sticker sa mga service vehicle sang Iloilo City Government.
Ini ang kaangot sa Anti-Epal Drive ukon ang ginpagwa sang Department of Interior and Local Government (DILG) Memorandum 2026-006 nga nagamandu sa tanan nga government offices nga sigurohon nga wala sang pangalan, litrato, logo, initials, color motif, slogan kag iban pa nga identifying symbol sang public official sa mga proyekto kag kagamitan nga ginpondohan sang gobyerno.
Sa interview sang Bombo Radyo kay Joy Fantilaga-Gorzal, spokesperson ni Mayor Raisa Treñas, iya ginpahayag nga nagpanaug sang Office Order ang City Administrator sang Pebrero 5 sa tanan nga offices nga ginhatagan sang service vehicle nga kakson na ang mga sticker kag slogan.
Suno kay Fantilaga, target nga maubos na ini ka pangkakas subong nga semana.
Madumdoman nga una man nga ginpangkakas ang mga litrato kag slogan sang alkalde sa Atipan Center sang Iloilo City Hall.
