ILOILO CITY – Nagpatigayon sang isa ka consultative meeting ang ang Task Force on Moral and Values Formation kaupod ang mga ginikanan sang mga minor de edad nga na rescue sa ginpatigayon nga raid sa Iloilo Terminal Market sang nakaligad nga semana.
Nagtambong man sa nasambit nga pagsinapol si Iloilo City Mayor Jerry Treñas agud nga ipahanumdom sa mga ginikanan ang ila tagsa ka katungdanan.
Suno kay Treñas, kinahanglan nga atipanon sang mga ginikanan ang ila kabataan agud nga makalikaw sa bisyo.
Ginpahayag ni Treñas nga welfare and safety kag ang paghatag sang maayo nga edukasyon sa mga minor de edad ang isa sa ginatutukan sang Iloilo City Government.
Magapatigayon man sang market inspection si Treñas agud personal nga makita kun bala may yara sang madakpan nga mga minor de edad nga nagaliho-liho.
Ini naman magduha-duha ang alkalde nga ipapreso ang sin-o man nga madakpan nga nagalapas sa kinamatarong sang mga minor de edad.
Samtang, kadungan sang ginpatigayon nga consultative meeting, nagpangayo sang pasaylo ang mga minor de edad nga na rescue sang Task Force on Moral and Values Formation.
Suno kay alyas Tisoy, indi na siya liwat mag-agi sa bintana sang ila balay agud nga makapalagyo.
Ginpahayag man ni alyas Tisoy nga nagabinutig siya sa iya ginikanan agud nga makahalin sa ila balay.
