Ginpangunahan ni Iloilo City Mayor Jerry Treñas ang inagurasyon sang subong nga adlaw sang duha ka outdoor gyms, fountain, kag gin-renovate nga public toilet sa Plaza Libertad sa Iloilo City Proper.
Sa interview sang Bombo Radyo kay Mayor Treñas, iya ginpahayag nga ang proyekto ang magapasanyog sang ikaayong lawas, makaparelaks nga lugar para sa tanan, kag nagapat-od sang convenience sang publiko.
Suno pa sa alkalde, ang aktibidad isa pa gid ka tikang sa paghimo sang makasaysayan nga plaza nga mas masinadyahon, inclusive, kag people-friendly para sa tagsa ka Ilonggo.
Ang proyekto ang suportado man sang Department of the Interior and Local Government (DILG), kon sa diin, ang pondo ang ginkuha sa Local Government Support Fund.
Tinutuyo man sang proyekto nga magserbe bila priority access para sa mga senior citizens ang outdoor gyms samtang bukas naman sa publiko ang libre nga comfort room ukon CR.
