Ginpasa na ni Iloilo City Mayor Jerry Treñas sa legal team sang syudad ang sabat sang Bureau of Fire Protection (BFP) Region 6 may kaangtanan sa ginhiwat sang damlag lang nga inauguration sang bag-o nga substation sa Alta Tierra Village, Jaro, Iloilo City apisar ini ang hugot nga ginadumilian.
Una na nga ginpadal-an sang show cause order sang COVID-19 team sang syudad ang BFP Region 6 bangud sa paglapas sa protocol sa tunga sang pandemya.
Sa interview sang Bombo Radyo kay Mayor Treñas, iya ginpahayag nga ang legal team na ang maga-imbestiga sa natabo kag mangin sa sabat sang talatapan.
Nahibaluan nga sa natabo nga inauguration, yara ang presensya ni Iloilo City Lone District Rep. Julienne “Jam-jam” Baronda kag BFP 6 Regional Director Fire Senior Supt. Atty. Jerry Candido.
