𝗜𝗟𝗢𝗜𝗟𝗢 𝗖𝗜𝗧𝗬 — Nagpasigurado si Iloilo City Mayor Jerry Treñas nga may ginahikotar na ang National Bureau of Investigation (NBI) kag Philippine National Police (PNP) agud tutokan ang Chinese Nationals nga naga-engage sa illegal activities sa syudad.
Sa interview sang Bombo Radyo kay Mayor Treñas, iya ginpahayag nga indi pa sini subong matumod kon ano ang mga iligal nga aktibidad ang ginapatuman sang mga Chinese Nationals sa Iloilo City.
Suno kay Treñas, indi sini anay luyag nga i-broadcast ang mga tikang kag plano nga ipatuman batok sa mga Chinese Nationals agud nga indi na sila nga makapalagyo kag makapanago.
Ginpahayag man sang alkalde nga kon may yara gidman sang mga iligal nga aktibidad, kinahanglan nga dakpon kag arestohon gilayon kag indi na dapat nga maghulat pa.
Ginlaragway man sini nga kon ang iligal nga naga-park sa dalan ang gilayon nga ginadakop, dapat man nga dakpon dayon ining mga Chinese Nationals.
Liwat man sini nga ginpaathag nga ang syudad ang wala nagatolerar sang ano man nga iligal nga aktibidad kag kon mapamatud-an nga nagbayolar sang layi, dapat ini nga dakpon kag ipa-deport.
