ILOILO CITY- Nagpasaka sang complaint ang Iloilo City Government batok sa Department of Health Central Office kasunod sang pagpagwa sang listahan sang ahensya sang mga lugar sa Pilipinas nga may pinakamataas nga kaso sang COVID-19 sa diin ikalima ang syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga sala ang reporting sang Department of Health nga 41 ang average daily COVID-19 cases nga narecord sa syudad.
Suno sa alkalde, nagalibog ang iya ulo kun sa diin nagakuha sang data ang ahensya bangud sa nagligad nga duha ka adlaw, anom tubtob siyam lang ang narecord nga kaso sa syudad sa sulod sang isa ka adlaw.
Pahayag sang opisyal, napalab-ot na niya ini nga concern kay Department of Health Region 6 director Dr. Marlyn Convocar apang wala pa ini nakasabat sa pamangkot sang alkalde.
Ipadala naman sang alkalde sa Inter-Agency Task Force ang nasambit nga complaint letter.
