Sa tunga sang tensyon kag kahadlok nga dala sang pagpanghold-up nga nagluntad SM City Iloilo sa Mandurriao, ginpakita ni Mayor Raisa Treñas ang iya simpatiya paagi sa personal nga pagpakig-angut sa pamilya sang suspek. Kadungan sang ila pagbisita sa opisina ni Iloilo City Police Office Director PCol. Kim Legada, ginpabutyag sang alkalde ang iya kabalaka matapos gindakop ang suspek.
Sa interview sang Bombo Radyo kay Joy Fantilaga-Gorzal, tagpamaba ni Mayor Treñas, ginpahayag niya nga ginmonitor sang alkalde ang insidente suno sa marching order nga dapat maresolba sa sulod sang 48 ka oras.
Sang ginpabalo sila sang ICPO, wala na sang pagduwa-duwa kag gilayon nga nagpadulong si Mayor Treñas sa headquarters.
Gin-istorya ni Treñas ang suspek kun ngaa ginhimo ang krimen, kag nakig-istorya man siya sa utod, asawa, kag pamilya sang suspek. Suno pa kay Fantilaga-Gorzal, nangin emosyonal ang asawa sang suspek, kag gilayon nga ginlaygayan ni Mayor Treñas nga handa ang city government magbulig sa ila kun ano man ang ila kinahanglanon.
Apang ginpabutyag man sang alkalde nga dapat sabton sang bana sini ang iya ginhimo bangud may nabiktima.
