Nagpabutyag si Iloilo City Mayor Jerry Treñas sang iya kahandaan nga maglumpat sa Iloilo River kun mapamatud-an sang iya detractors nga siya ang nagapanag-iya sang 200 ka units sang Grab cars sa syudad.
Sa interview sang Bombo Radyo kay Treñas, iya ginpahayag nga sa subong, wala pa siya nakarekober gid apang sa tion nga magpauli siya sa Iloilo, malumpat ini sa suba kun matuod ang amo nga alegasyon batok sa iya.
Ginhangkat naman sang alkalde ang mga tawo sa likod sang amo nga isyu nga maglumpat man sila sa Iloilo River kun indi nila mapamatud-an nga iya ang 200 units sang Grab cars.
Matandaan nga ginpahayag ni former Mayor Jed Patrick Mabilog nga may tawo sa City Hall nga nagapanag-iya sang amo kadamo nga units sang Grab car nga naga-operate sa siyudad.
Nahibaluan nga nagawangal man ang mga taxi drivers bangud kaangay nga ginaagawan sila sang pasahero kag palangabuhian sang mga Grab cars.
