ILOILO CITY – Plano ni Mayor Jerry Treñas nga ibalik sa 50% ang capacity sa tanan nga Public Utility Jeepney sa syudad sang Iloilo.
Sa interview sang Bombo Radyo kay Treñas, iya ginpahayag nga hingyuon niya sa Land Transportation Office kag sa Land Transportation Franchising and Regulatory Board nga dugangan ang numero sang mga pasahero nga mahimo makasakay sa tagsa ka PUJ.
Suno kay Treñas, iya nakita nga tuman ka pigado ang kita sang mga driver kun pito lang ka bilog nga pasahero ang mahimo nga makasakay bangud sa ginapatuman nga 1-meter physical distance.
Ginkalipay naman sang mga transport group sa syudad sang Iloilo ang nasambit nga lihok sang alkalde.
Sa interview sang Bombo Radyo kay Raymundo “Boyet” Parcon, Presidente sang Iloilo City Loop Alliance of Jeepney Operators and Drivers Association (ICLAJODA), iya ginpahayag nga tuman ka pigado ang kita kun pito lang ka bilog nga pasahero ang mahimo nga makasakay sa tagsa ka unit.
Sa tion nga madayon ang hingyo sang alkalde, ginpahayag ni Parcon nga daku ang mabulig sini sa mga driver lakip na sa mga operator.
Apisar nga ginpahayag ni LTFRB Region 6 Director Richard Osmeña nga status quo anay ang 50% capacity apang kasubong nga ginakulbaan ang mga driver nga mahimo sila dakpon bangud sa ginapatuman nga 1 meter nga physical distance.
Bangud nga wala pa sang feedback ang LTFRB central office tuhoy sa fare hike nga ginahingyo sang transport group, ginpahayag ni Director Osmeña nga temporaryo anay nga pagasundon ang 50% capacity.
