ILOILO CITY – Magapadala sang appeal letter sa National Inter-Agency Task Force si Mayor Jerry Treñas agud hingyuon nga ipabilin sa Modified General Community Quarantine ang syudad sang Iloilo paglampas sang Hunyo 15.
Ini ang kasunod sang initial recommendation sang task force nga ipaidalom sa General Community Quarantine ang bug-os nga syudad bangud sa nagadamo nga Coronavirus Disease 2019 (COVID-19) cases.
Sa interview sang Bombo Radyo kay Treñas, iya ginpahayag nga ginabalay pa ang appeal letter kag nagalaum siya nga paboran sang task force ang iya hingyo.
Suno kay Treñas, mas makapaayo nga ipabilin na lang sa Modoified General Community Quarantine ang bug-os nga syudad bangud nga may yara man sang ikasarang ang Iloilo City Government sa pagpatigayon sang COVID-19 response.
Samtang, gin-ako sang alkalde nga gutok na ang mga facility quarantine sa syudad sang Iloilo.
Sa pagpaathag sang natungdan, mahinay ang pagpaguwa sang test results rason nga nagakadugayan man sa facility quarantine ang mga ginadudahan nga may COVID-19.
Mas makapaayo suno kay Treñas nga damuon pa gid ang laboratoryo nga nagapatigayon sang COVID-19 test agud nga makahimo man sang adjustment sa ginapatuman nga quarantine protocol.
