ILOILO CITY – Hugot nga ginpangabay sang alkalde sang syudad sang Iloilo sa publiko nga pakamaayuhon nga indi nalang anay magwa sa mga balay tubtob wala pa ginbatak sa Modified Enhanced Community Quarantine (MECQ) ang status sang syudad.
Ini matapos nagsaka sa 64 ang kaso sang COVID-19 sang Mayo 18 sa diin ini na ang pinakamataas nga narekord nga tally sa sulod lamang sang isa ka adlaw sa bug-os nga 2021.
Sa interview sang Bombo Radyo kay Iloilo City Mayor Jerry Treñas, iya ginpahayag nga makahalangawa na ang paglapta sang COVID-19 sa syudad.
Ini ang kasunod man sang kamatayon sang negosyante nga abyan sang alkalde bangud man sa COVID-19.
Ang negosyante suno sa alkalde ang isa man sa masami nga nagahatag sang suhestyon kag nagapaminsar kun paano mabuligan kag mabatak ang ekonomiya sang syudad sang Iloilo.
Nagpahanumdom man si Treñas sa publiko nga matuod ang COVID-19, sa diin makapatay ini kag madasig nga nagalapta.
Samtang, may kaangtanan sa update natuhoy sa pag-apruba sang Inter-Agency Task Force on Emerging Infectious Diseases (IATF-EID) sa hingyo sang syudad nga ipaidalom sa MECQ ang Iloilo City, ginpahayag ni Treñas nga ginafollow-up na niya ini.
Posible suno sa alkalde nga makahatag na sang desisyon ang IATF sa sini nga semana gani magahulat lamang ang syudad samtang istrikto nga ginapatuman ang health protocols.
