ILOILO CITY – Hulaton ni Iloilo City Mayor Jerry Treñas ang sabat sang siyam ka commercial establishment nga naglapas sa Executive Order 46 ukon General Bar Guidelines kadungan sang pagdula sang Liquor Ban sa syudad sang Iloilo.
Sa interview sang Bombo Radyo kay Treñas, iya ginpahayag nga may yara lamang sang 72 ka oras ang siyam ka commercial establishment agud nga makapaathag kun nga-a wala nila natuman ang nakasaad sa General Bar Guidelines.
Suno kay Treñas, ang iya desisyon ang nakadepende sa sabat sang siyam ka commercial estalishment nga nauna nga nakitaan ang kapaltahan sang composite team nga nagapatigayon sang inspection.
Ginpahayag ni Treñas nga iya gid nga ipatuman ang One Strike Policy batok sa mga violator.
Samtang, tuhoy naman sa ginapatuman nga Oplan Hawan sa palibot sang Iloilo Terminal Market, ginpahayag ni Treñas, wala pa niya nabaton ang recommendation gikan sa Local Economic and Enterprise Office kasunod sang ginpatigayon nga pagsinapol kaupod ang mga apektado nga transient vendors.
Ginpahayag ni Treñas nga hulaton niya ang recommendation bag-o magdesisyon.
Kadungan sini, padayon sa gihapon suno sa alkalde ang pagpatigayon sang Oplan Hawan santo sa mandu sang Department of Interior and Local Government.
