ILOILO CITY- Indi kumporme si Iloilo City Mayor Jerry Treñas sa resulta sang pagsugod sang Iloilo City Government sang rollout sang 2nd dose sang booster shot kontra sa COVID-19.
Sa interview sang Bombo Radyo kay Mayor Treñas, iya ginpahayag nga kahapon, 12 gid lamang ang nag-avail sang second dose sang booster shot.
Suno sa alkalde, bangud sini, mas pabaskugon kag pasangkaron pa sang syudad ang kampanya agud mas madamo pa ang magpadulong sa mga health centers para magpatublok.
Kalakip sa mga mahimo magpatublok sang 2nd shot sang booster dose amo ang mga indibidwal nga may immunodeficiency, HIV kag cancer patient, indibidwal nga nagbaton sang transplant, pasyente nga nagainom sang immunosuppressive drugs (steroids, etc.), kag mga pasyente nga bed- ridden kag may yara sang taning na ang kabuhi.
Kinahanglan nga tatlo ka bulan na ang nakaligad matapos natublukan saang 1st dose sang booster shot antes matublukan sang ikaduha nga booster dose.
