Gintuad ni Iloilo City Mayor Jerry Treñas nga indi na siya magpatol ukon magsapak pa kay Iloilo City District Engineering Office (ICDEO) Head Engineer Roy Pacanan.
Sa interview sang Bombo Radyo kay Mayor Treñas, iya ginpahayag nga apisar nga wala sa bungog ni Pacanan ang mag-response sa hingyo sini, kontani sabton na lang sang ICDEO Head ang mga letter nga ginpadala sang mas superior sa iya.
Suno kay Treñas, nagakadapat lang magsabat si Pacanan agud nga mahibaluan ang kahimtangan sang mga wala natapos nga proyekto sang syudad lakip na ang mga multi-purpose gym.
Ginpahayag man sang alkalde nga subong lang gid siya nakasumalang sang isa ka ICDEO Head nga daw wala lang sang problema.
Kon balikan, hugot nga ginpanindugan ni Engr. Roy Pacanan nga wala nagkulang ang iya opisina sa pagpadala sang mga nagakaigo nga dokumento sa Iloilo City Government nahanungod sa ila nga mga proyekto.
Kabahin ini sang kaundan sang sabat ni Pacanan sa Memorandum nga ginpadala ni Engr. Sanny Boy Oropel natuhoy sa request ni Mayor Treñas nga supporting documents sang funding sources sang mga ongoing infrastructure projects.
Pahayag ni Pacanan, dapat nga ma-address ni Treñas ang matuod nga isyu tuhoy sa non-completion sang 190 projects nga ginaimplementar sang City Government, kalakip ang construction sang Arevalo, La Paz, kag Jaro Big Markets, amo man ang Iloilo City Hospital.
Suno pa sa iya, indi pagtugutan sang iya opisina nga mabiktima sang pulitikal nga pagpanglimbong sang alkalde.
