ILOILO CITY – Istriktuhan sang Iloilo City Government ang pagpa-ihaw sang baboy agud nga indi maapektuhan sang African Swine Fever ang hog industry sa syudad sang Iloilo.
Ini ang kasunod sang pagpadulong sang US Agricultural attaché sa syudad sang Iloilo sa diin suno sa opisyal, mabudlay tapnaon ang African Swine Fever.
Sa interview sang Bombo Radyo kay Iloilo City Mayor Jerry Treñas, iya ginpahayag nga bisan nga wala man sang epekto ang pag-ihaw sa paglapta sang African Swine Fever apang mas makapaayo nga masigurado nga matinlo ang mga karne nga ginabaligya sa merkado.
Suno kay Treñas, luyag niya nga matinlo ang pag-ihaw sang baboy agud nga indi mangin kontaminado ang mga produkto.
Ginpahayag ni Treñas nga may yara na sang Task Force nga gintukod agud nga magtutok sa mga seaport kag airport agud magpatigayon sang inspection sa mga ginapalusot nga produkto.
Nahibalu-an nga una na nga nagpaguwa sang Executive Order 99 ang alkalde nga nagadumili sa pagbaton sang meat products gikan sa iban nga lugar.
