ILOILO CITY – Wala ginkanselar ni Iloilo City Mayor Jerry Treñas ang mga klase sang mga estudyante sa syudad sang Iloilo apisar sang mamunog nga ulan nga ginareklamo sang mga residente nga nagaapekto sa pagpanagtag sang modules kag sa internet connection.
Sa interview sang Bombo Radyo kay Mayor Treñas, iya ginpahayag nga sang siya ang nagkonsulta sa Department of Education (DepEd), ginpahayag sang ahensya nga online man ang mga klase kag indi face-to-face gani indi na problema ang ulan.
Nagpahayag ang alkalde nga sa masunod nga matabo ang kaangay nga sitwasyon, indi na siya maglisensya sa DepEd kag diretsuhon na lang ang pagkanselar sang mga klase.
“Wala man sila guro kaintindi sang internet connection kag te indi man guro ila problema ang internet connection. Te sa dason kun mag-amo ni ang sitwasyon, indi na ko magpamangkot sa DepEd. Madiretso na lang ako cancel kay te kun mamangkot ta sa ila gali, indi sila gusto icancel bisan nabudlayan ang mga kabataan. Naanad naman na ang DepEd siguro magpaagwanta sa mga kabataan,” pahayag sang alkalde.
Samtang, nagsabat naman ang DepEd Iloilo City nga may yara na sang standing order sa mga school heads nga indi pagpiliton ang mga manunudlo kag kabataan kun malain ang tiempo.
Sa interview sang Bombo Radyo kay Iloilo City Schools Division Superintendent Dr. Ma. Luz Delos Reyes, iya ginpahayag nga napahangop niya sang maayo sa mga mga pinuno sang mga eskwelahan nga ikonsiderar kag ireschedule lang ang tagtaganay sang modules bangud indi mahimo mabutang sa risgo ang ikaayong lawas sang mga manunudlo.
“May standing order man ako nga unahon ang safety sang mga maestra kag kabataan. Nga kun malain ang tiyempo, indi pagpiliton. Kun mabudlay, kun gabinaha, pwede man nga ang mga teachers, ma-stay at home lang sila anay kag indi lang pagpiliton ang pagdistribute sang mga modules. Kun may online nga mga klase, pwede man na nga mareschedule lang the following day.”
Ang alkalde lang suno sa natungdan ang may gahum nga makadeklarar sang kanselasyon sang klase.
Wala pa suno sa opisyal sang nabaton ang ila nga talatapan nga reklamo may kaangtanan diri.
