ILOILO CITY- Ginakondenar ni Iloilo City Lone District Representative Julienne Baronda ang natabo nga pagluthang-patay kay former Punong Barangay Ernie Poral sang Ingore, La Paz, Iloilo City.
Sa interview sang Bombo Radyo kay Baronda, iya ginpahayag nga nagalaum siya nga tutukan gid sang kapulisan ang pagsolbar sang kaso.
Suno kay Baronda, makaalarma ini ilabi na nga sang damlag lang, may insidente man sa Bonifacio, Arevalo sang ginsulod sang wala makilal-an nga mga indibidwal ang balay ni Punong Barangay Arnold Baterna nga maswerte nga yara ini sa ila barangay hall sang natabo ang pagsulod sa iya balay.
Pahayag ni Baronda, magapakig-sugilanon man ini sa kapulisan sang syudad sa pinakamadali nga panahon agud maistoryahan ang pagpasangkad pa sang paghatag sang seguridad sa publiko agud indi na ini masulit pa.
Gindugang naman sang kongresista nga base sa mga pagsugilanon nila ni Poral, wala man ini sang nasugid nga may pagpamahog sa kabuhi ang anay punong barangay.
Sa bahin naman ni Mayor Jerry Treñas, iya man ginakondenar ang natabo kag nagmando na ini kay Iloilo City Police office Director Police Colonel Legada Kim nga kilalahon, arestahon kag pasabton gid sa layi ang sin- o man nga responsable sa pagpatay kay Poral.
