Nagpanghatag sang pagkaon sanday Mayor Raisa Treñas kag Sangguniang Bayan Member Katya Tico Delgado sang Jordan, Guimaras sa mga pasahero nga na-stranded sa Parola Wharf bangud sang temporaryo nga pagsuspender sang biyahe pa-Guimaras tungod sa bagyo.
Sa interview sang Bombo Radyo kay Tum-Tum Paulino, kagawad sang Brgy. Concepcion, City Proper, Iloilo, iya ginpahayag nga ginbuligan sang alkalde kag sang SB member ang mga na-stranded nga pasahero paagi sa pagdistribuer sang cup noodles, tinapay, kag tubig, paluto sang kan-on kag sud-an agud mabuligan ang ila kinahanglanon samtang ginahulat ang pagbukas liwat sang biyahe.
Dugang pa ni Paulino nga padayon ang pagmonitor kag pagbulig sang mga opisyal sang Barangay Concepcion, City Proper, kaupod ang City Social Welfare and Development Office (CSWDO), sa mga pasahero nga na-stranded.
May mga health personnel man nga naka-standby sa lugar sa tion nga may pasahero nga magakinahanglan sang medikal nga bulig.
Ginpahayag man nga may mga pasahero nga halin pa alas-12 sang udto ang na-stranded kag padayon nga nagahulat nga mabalik ang biyahe pa-Guimaras.
Padayon ang koordinasyon sang mga otoridad agud masiguro ang seguridad kag kahimtangan sang mga pasahero samtang ginapadayon ang suspension sang byahe.
By: 𝑩𝒐𝒎𝒃𝒐 𝑲𝒓𝒚𝒍𝒍𝒆 𝑴𝒆𝒍𝒍𝒊𝒛𝒂
