Kumpyansa si Iloilo City Mayor Jerry Treñas nga sa palaabuton nga Disyembre, malab-ot na sang syudad sang Iloilo ang 75 percent nga vaccination rate ukon ang herd immunity.
Sa interview sang Bombo Radyo kay Mayor Treñas, iya ginpahayag nga wala untat ang masangkad nga COVID-19 vaccination sa syudad sa diin sa masunod nga semana, maabot naman ang 28,000 doses sang AstraZeneca COVID-19 vaccines nga ginprocure sang Iloilo City.
Suno sa alkalde, maabot man sa sunod nga semana ang 10,000 doses sang Sinovac vaccine halin sa national government.
Ginpat-od man ni Treñas nga malapad pa ang espasyo sang freezer sang syudad para sa mga maga-abot nga bakuna nga i-donar sang gobyerno.
Pahayag ni Treñas, kadungan sang naga-inabot nga bakuna sa syudad, nagapasalamat man siya nga nagataas man ang numero sang mga indibidwal nga nagapabakuna sa ila kada barangay kalakip na sa pila ka vaccination sites.
Bangud sini suno sa alkalde, posible nga sa una ukon ika-duha nga quarter sang 2022, masaka na sa 90 percent ang vaccination rate sang syudad sang Iloilo.
Sa pihak sini, nagapadayon ang panawagan sang Iloilo City Government sa mga pumuluyo nga magpabakuna batok sa COVID-19 bangud kadam-an sa mga gina-igo sang virus amo ang mga indi bakunado nga indibidwal.
