ILOILO CITY – Madamu sang bag-uhon si Iloilo City Mayor Jerry Treñas kadungan sang pag-umpisa sang iya terminobilang alkalde sang syudad sang Iloilo.
Sa una pa lang nga adlaw sang pagpangalagad ni Treñas, gilayon siya nga nagpatigayon sang inspection sa Iloilo City Hall building.
Sa interview sang Bombo Radyo kay Treñas, iya ginpahayag nga madamu sang mga air conditioning units nga guba, mga tiles nga buka, nagatulo nga atop kag ang gubaon nga elevator.
Magluwas diri, luyag man nga dulaon ni Treñas ang combo kag buffet sa Penthouse sa tagsa ka Lunes nga ginakabig nga pinakamasako nga adlaw.
Sa baylo nga magkinasadya sa Penthouse sa tagsa ka Lunes, ginpahayag ni Treñas nga dapat magtrabaho ang mga empleyado sang Iloilo City Hall bangud nga madamu ang transaksyon sa nasambit nga adlaw.
Pagkatapos sang inspection, nagpatigayon man si Treñas sang pagsinapol sa pinili nga department heads.
Lakip sa iya ginsapol amo sanday incoming Iloilo City Administrator Melchor Tan, incoming City Legal Officer Atty. Edgar Gil kag ang incoming officers nga magabug-os sa Bids and Awards Committee (BAC).
Isa man sa ginatun-an sang alkalde amo nga mahatagan na sang sweldo ang mga job hires nga wala pa naswelduhan sa sulod sang pila ka bulan.
Usisaon man sang natungdan ang tuhoy sa mga pending nga proyekto sa Iloilo City Government.
