ILOILO CITY – Makigsapol si Iloilo City Mayor Jerry Treñas sa mga negosyante sa syudad sang Iloilo agud istoryahan ang tuhoy sa pagbakal sa COVID-19 vaccine.
Sa interview sang Bombo Radyo kay Treñas, iya ginpahayag nga kun luyag sang business sector nga mangin COVID-19 free ang syudad sang Iloilo, nagakadapat nga magbulig ang mga ini sa pagbakal sang bakuna.
Suno kay Treñas, naka-istorya na siya sa British-Swedish multinational pharmaceutical kag biopharmaceutical company nga AstraZeneca kag nakapangayo na ini sang 20 percent nga down payement agud ibakal sa una nga hugnat sang bakuna.
Nagalaum naman ang alkalde nga mangin positibo ang sabat sang mga negosyante sa syudad sang Iloilo.
Nahibaluan nga ang Chairman sang Bombo Radyo Philippines nga si Dr. Rogelio Florete ang nagsabat man sa panawagan sang alkalde nga magbakal sang COVID-19 vaccine para sa mga regular nga empleyado sang Florete Group of Companies.
