ILOILO CITY – Ginpanindugan ni Iloilo City Mayor Jerry Treñas nga indi chismis ang iya ginbuyagyag nga social media scandal ni Dr. Beranrd Caspe, pinuno sang City Legal Office.
Sa interview sang Bombo Radyo kay Treñas, iya ginpahayag nga kamatuoran lamang ang iya ginabuy-an nga pahayag.
Suno kay Treñas, handa siya nga atubangon ang mga kaso nga ipasaka ni Caspe batok sa iya.
Ginpahayag sang alkalde nga wala siya sang katuyu-an nga gub-on kag pakahuy-an si Caspe kundi ang tanan nga iya ginapanghambal ang nakabase sa facts ukon kamatuoran.
Ginatugyan na lang ni Iloilo City Mayor Jerry Treñas sa City Legal Office ang kaso ni Mr. Joemarie Esteral, bookeeper sang Local Civil Registry nga gin-assign sa Calajunan Dumpsite.
Ini ang kasunod sang ginpaguwa ni Treñas nga 60-day suspension batok sa kontrobersiyal nga si Esteral nga nagbalik sa iya mother unit nga wala sang pahanugot gikan sa alkalde.
Sa interview sang Bombo Radyo kay Treñas, iya ginpahayag nga sa tagsa ka lihok, may yara gid sang konsekwensya.
Suno kay Treñas, nakadepende na sa City Legal Office ang pagdesisyon sa ginakaulamiran nga kontrobersiya ni Esteral.
Nahibalu-an nga si Esteral ang nangin kontrobersiyal matapos nga gin-angot nga bagman ni Mr. Juncae Manikan nga pinuno sang Local Civil Registry, tuhoy sa 180 ka peke nga kasal.
Bangud sini, ginpasakaan ni Esteral sang kaso nga grave coercion, grave misconduct kag oppression si Treñas kag iban pa nga empleyado sang Iloilo City Hall.
