ILOILO CITY – Wala nagapanghingabot si Iloilo City Mayor Jerry Treñas kay Local Civil Registry Head Mr. Juncae Manikan.
Ini ang kasunod sang pagsabat ni Manikan sa show cause order nga ginpadala ni Treñas bangud sa ginapahayag 180 ka peke nga kasal nga ginrehistro sa Local Civil Registry.
Sa interview sang Bombo Radyo kay Treñas, iya ginpahayag nga bisan ano nga reklamo nga ginpalab-ot sa iya talatapan ang iya gid nga ginapausisa.
Suno kay Treñas, ang 180 ka peke nga kasal ang isa ka seryoso nga isyu ilabi pa nga naangot sa kontrobersiya ang Local Civil Registry nga ginapamunu-an ni Manikan.
Ginpahayag ni Treñas nga kun bias siya, kun tani, wala sang ginpatigayon nga imbestigasyon kag iya na lang nga pasakaan sang kaso si Manikan.
Samtang, handa naman si Treñas nga atubangon ang mga kaso nga ginpasaka batok sa iya ni Dr. Bernard Caspe, pinuno sang City Health Office.
Suno kay Treñas, kasubong nga baliskad ang natabo bangud nga siya pa ang ginpasakaan ni Caspe sang kaso.
Sa pagpaathag sang alkalde, wala sang kamatuoran nga iya gin-akusaran si Caspe nga nagapamulitika kag naangot sa imoralidad.
Sa pagkamatuod suno sa natungdan, may yara gid man sadto sang ginkaulamiran nga eskandalo si Caspe sa diin naglapta sa social media nga may yara siya sang kaupod nga isa ka babayi.
Sa nagakatabo subong suno kay Treñas, kasubong nga guilty si Caspe.
Tuhoy naman sa ginapahayag midnight appointment sa Iloilo City Hal, ginpahayag ni Treñas nga naglab-ot sa 180 ka illegal appointment ang na record.
Suno kay Treñas, ang mga nasambit nga appointment ang natabo sang Enero tubtub Marso subong nga tuig sa diin wala sang quorum sang natigayon ang appointment.
Sa subong suno kay Treñas, gina-usisa na ang tuhoy diri kag kun mapamatud-an, magabalik sa ila daan nga posisyon ang mga empleyado nga nalakip sa midnight appointment.
