Nagapanawagan si Iloilo City Mayor Raisa Treñas sa national government nga padasigon ang approval process sang mga bag-o nga power-generation projects.
Ini agud gilayon nga makasugod ang konstruksyon sang mga proyekto kag madugangan ang supply sang kuryente sa Panay kag Guimaras.
Sa interview sang Bombo Radyo kay Joy Fantilaga-Gorzal, Spokesperson ni Mayor Raisa Treñas, iya ginphayag nga may tatlo na ka commitments para sa dugang nga power capacity-duha sa Iloilo City kag isa sa Panay/Guimaras.
Lakip diri ang dugang nga generation capacity sang Panay Energy Development Corporation ukon PEDC nga target mag-operate sa 2028.
Ginalauman man ang pagpasulod sang PH Natural Gas sa Iloilo City, kag ang ginakomiter nga 40-megawatt capacity sang MORE Power Barge sa Guimaras nga target mag-operate sa una nga quarter sang 2027.
Suno kay Mayor Treñas, indi na dapat magsalig ang rehiyon sa isa lamang ka source sang kuryente, ilabi na nga yara ang Panay sa tail end sang grid kag padayon nga nagadaku ang demand sa kuryente.
