ILOILO CITY- Nagpangabay si Iloilo City Mayor Jerry Treñas sa Department of Foreign Affairs (DFA) nga padasigon ang appointment kag transaction process sang mga indibidwal.
Sa interview sang Bombo Radyo kay Mayor Treñas, iya ginpahayag nga sa sulat nga ginpadala niya kay DFA Secretary Tedoro Locsin Jr. kag kay Sheila Marie Tu, Officer in Charge sang Regional Consular Office nga nahamtang sa isa ka mall sa Quezon St., Iloilo City, ginplastar niya nga madamo sang pumuluyo ang nagpalab-ot sang reklamo bangud sa tuman ka dugay nga proseso sang application, renewal kag release sang passports.
Suno pa sa alkalde, mangin sa DFA website, wala man sang available slot para sa appointment tubtob sa Agusto 2022.
Ginrekomendar sang alkalde nga kuntani magdugang ang DFA sang personnel nga in-charge sa pagproseso sang appointments.
Suno pa sa iya, apisar nahangpan niya nga yara sa period ang adjustment ang DFA bangud sa pandemya, katungdanan sini bilang ahensya sang gobyerno nga maghatag sang efficient nga serbisyo sa mga pumuluyo.
