ILOILO CITY- Ginhatagan sang lima ka adlaw agud magsabat si City Tourism Office assistant department head Eireen “Ayen” Manikan kasunod sang pag-isyu sang show cause order ni Iloilo City Mayor Jerry Treñas angot sa kaso nga electioneering kag failure to act upon a particular complaint sang assigned pa ini sa Customer Care Center.
Sa interview sang Bombo Radyo kay Manikan, iya ginpahayag nga nabaton niya ang order sang Oktubre 2,2019.
Suno kay Manikan, confident ini nga masabat niya sang insakto ang nasambit nga show cause order bangud nga kamatuoran lamang ang iya ginauyatan.
Ginpahayag niya nga himo-himo lang ang kaso nga electioneering batok sa iya kag indi man gani niya kilala ang mga tagreklamo nga sanday Dennis Biñas, Julia Bitonga, Jena Jose kag Donephine Dominggo.
Dugang pa niya, indi man matuod nga may bes nga napaslawan ini nga aktuhan ang isa ka reklamo sang yara pa ini sa Customer Care Center bangud may ara kuntani sang file ukon record kag feedback may kaangtanan sa amo nga reklamo.
Sa subong suno sa natungdan, ginaasikaso na nila sang iya abugado nga si Atty. Raleigh Silvino Manikan ang ila mangin sabat sa show cause order.
Wala naman nagalaum si Manikan nga mangin patas ang dalagan sang kaso.
Apang naghingyo ini nga mag-atubangay sila sang tanan nga involved sa kaso agud nga maathagan kun ano ang gid ang motibo sa likod sang kaangay paghingabot sa iya.
