ILOILO CITY – Nagahingyo si Iloilo City Mayor Jerry Treñas sang bulig sang pumuluyo agud nga mapabilin nga mahawan ang mga dalan gikan sa obstruction.
Sa interview sang Bombo Radyo kay Treñas, iya ginpahayag nga indi masarangan sang Public Safety and Transportation Management Office kag sang Taskforce Anti-Squatting and Illegal Structures Unit ang pagpanguha sang obstruction sa mga dalanon sa syudad.
Suno kay Treñas, kinahanglan nga sundon sang tanan ang ginapatuman nga Oplan Hawan bangud nga ini ang mandu mismo ni Presidente Rodrigo Duterte.
Sa subong suno sa natungdan, magapadayon ang Oplan Hawan sa mga dalanon sa syudad sang Iloilo.
Nahibalu-an nga 60 ka adlaw lamang ang ginhatag sang Department of Interior and Local Government Unit sa tagsa ka Local Chief Executives agud nga matinlu-an ang sidewalk kag ang dalan gikan sa mga obstruction agud nga mangin matalunsay ang dalagan sang trapiko.
Silutan sang preventive suspension ang Local Chief Executive nga mapaslawan sa pagpatuman sang clearing operations.
