Nagapati si Iloilo City Mayor Jerry Treñas nga magapadalagan si former Iloilo City Mayor Jed Patrick Mabilog sa 2025 midterm elections.
Sa interview sang Bombo Radyo kay Mayor Treñas, iya ginpahayag nga ang tanan ang may kinamatarong man nga magpadalagan, kon sa diin, ginalantaw sini nga posible sa pagka-alkalde ukon bise-alkalde ang padalaganan sang anay alkalde.
Suno kay Treñas, ini ang kamatuoran sa kabuhi kag indi man sini mapunggan kon tuyo gidman sang anay alcalde nga magbalik sa pulitika.
Ginapanan-aw man sini ang posibilidad nga i-endorso ni Mabilog si Iloilo City Lone District Representative Julienne “Jam-jam” Baronda.
Gintumod man sang alkalde nga “always” nga kabahin sang ila grupo si Mabilog, apang nagbaylo na ang tanan bangud man yara na sa lain nga linyada si Congresswoman Baronda.
Gin-athag man ni Treñas nga kon kontra niya si Mabilog, kontani wala na niya ginpahanagutan ang hinablos sini nga si Sheen Marie Mabilog nga magpanumpa sa iya Partido nga National Unity Party (NUP).
