𝗜𝗟𝗢𝗜𝗟𝗢 𝗖𝗜𝗧𝗬 — Nagapati si Iloilo City Mayor Jerry Treñas nga konektado sa kaaway niya sa pulitika ang abogado ni Provincial Information and Community Affairs Office head Mr. Nereo Lujan.
Ini kasunod man sang pagpasaka ni Lujan sang kaso nga grave misconduct, grave abuse of authority, conduct unbecoming, kag acts prejudicial to the interest of service batok sa alkalde.
Sa interview sang Bombo Radyo kay Treñas, iya ginpahayag nga may koneksyon sa politika ang rason kun ngaa nag-file si Lujan sang kaso batok sa iya kag bangud man sa koneksyon sang abogado sini sa kontra ni Treñas sa politika.
Suno kay Treñas, “politically motivated” ang pagpasaka sang kaso ni Lujan bangud ang konstruksyon sang Iloilo Central Market ang legal kag may pahanugot sang National Historical Commission of the Philippines (NHCP).
Liwat naman nga ginpanindugan ni Treñas nga nag-agi sa insakto ang tanan nga proseso sa pag-rehabilitate sang Iloilo Central Market.
Nahibaluan nga ginalauman nga matapos ang merkado sa Disyembre 2024.
Kun balikan, una na nga nagpasaka sang kaso si Treñas batok kay Lujan.
Ini amo ang cyber libel, civil case for damages, kag administrative case sa Civil Service Commission.
