𝗜𝗟𝗢𝗜𝗟𝗢 𝗖𝗜𝗧𝗬 — Nagapati si Iloilo City Mayor Jerry Treñas nga ‘wala sang forever’ sa police ini kasunod man sang pagtal-os ni Police Colonel Kim Legada kay Police Colonel Joeresty Coronica bilang bag-o nga Director sang Iloilo City Police Office.
Sa interview sang Bombo Radyo kay Treñas, iya ginpahayag nga ang mga kapulisan ang nagasunod lamang sa hierarchy ukon sistema sang ila nga ahensya agud nga mangin isa ka epektibo nga katapo sang gobyerno.
Suno kay Treñas, daw kaangay man ini sa natabo sa Davao nga tatlo ka beses na nga naislan ang ila nga Director sang ila Police Office.
Ginpahayag man sang alkalde nga isa man ini ka rason agud nga mas pasangkaron ang serbisyo sa seguridad sang Iloilo City Police Office sa syudad.
Ini bangud man sa pagpati sang alkalde nga kinahanglanon masangkad nga presensya sang kapulisa bangud sa madasig nga pag-uswag sang Iloilo City.
Nahibaluan nga masobra isa ka tuig nga nangin Director si Police Colonel Coronica sa Iloilo City antes paman nga ginbuslan ni Police Colonel Kim Legada.
