Liwat nga naghingyo ang Iloilo City Government sa COVID-19 Inter-Agency Task Force for the Management of Emerging Infectious Diseases (IATF) nga panubuan ang quarantine classification sa syudad.
Sa interview sang Bombo Radyo kay Iloilo City Mayor Jerry Treñas, iya ginpahayag nga nagapadayon na sa pagnubo ang kaso sang COVID-19 sa syudad apang nagakaapektuhan lamang ang hospital utilization rate bangud kadam-an nga nagapa-admit sa mga ospital sa Iloilo City ang halin sa probinsya.
Suno kay Treñas, nagakadapat binag-binagon sang IATF nga indi na makabatas ang syudad sa padayon nga pagsarurot sang ekonomiya sa diin tuman ka apektado na ang mga mamumugon halin sa trisikad drivers tubtob sa karenderya owners.
Pahayag sang alkalde, nagapasalamat man siya sa gobyerno sa ginapalab-ot nga bulig sa syudad kaangay sang ayuda nagikan sa Department of Social and Welfare Development (DSWD), apang indi ini sa gihapon bastante kag halos nabudlayan na ang tanan sa pagpaigo sang adlaw-adlaw nga gasto.
Wala naman bilin suno kay Treñas ang 10,000 nga food boxes halin sa DSWD kag ang ginapanagtag nga ayuda sa kada barangay ang halin na mismo sa pondo sang Iloilo City Government.
