ILOILO CITY – Ginpaandaman ni Iloilo City Mayor Jerry Treñas ang Department of Public Works and Highways kaangot sa pagpatuman sang proyekto nga wala sang permits.
Sa interview sang Bombo Radyo kay Treñas, iya ginpahayag nga antes maumpisahan ang proyekto, nagakadapat nga may yara sang permit ang ahensya agud masigurado nga wala sang problema sa ulihi.
Ang pahayag sang alkalde ang kasunod man sang pagpagwa sang cease and desist order sa breakwater project sang ahensya nga nagasakop sa Barangay Rizal Pala-Pala kag Barangay Barangay Tanza sa Iloilo City Proper.
Ini nga proyekto ang yara sa idalom sang opisina ni Iloilo City Lone District Rep. Julienne “Jamjam” Baronda.
Ginkumpirma man sang alkalde nga makigsapol kuntani sa iya si Engr. Sanny Boy Oropel, apang wala ini nadayon bangud wala nagsanto ang ila schedule.
