ILOILO CITY – Nagpaandam si Iloilo City Mayor Jerry Treñas sa mga empleyado ukon opisyal sang Iloilo City Hall nga nagaserbe nga protector sang mga illegal aliens sa syudad.
Sa interview sang Bombo Radyo kay Treñas, iya ginpahayag nga indi niya pagkonsentihon ang nga empleyado ukon opisyal nga mapamatud-an nga amo ang sa likod sang pagsulod sang mga illegal immigrants ilabi na ang mga undocumented nga Chinese nationals.
Suno sa alkalde, wala sang pulos sang ang ginahimo nga pagpanghugot kun may yara sang corrupt sa Iloilo City Hall nga nagabaton sang kwarta agud makasulod ang mga undocumented nga Chinese nga nagahimo sang mga iligal nga aktibidad sa syudad.
Ini ang kasunod naman sang nagadamo nga illegal immigrants sa Iloilo City sa diin naga-istar ang mga ini sa mga exclusive subdivision kag may yara pa sang mga luxury sports utility vehicles.
Ginpahayag ni Treñas, nga dapat hugtan man sang Bureau of Immigration ang pagsulod sang mga Chinese sa syudad.
Gin-athag man sang alkalde nga welcome man sa syudad ang mga Chinese nga may nagakaigo nga dokumento kag luyag magnegosyo.
