ILOILO CITY – Nagpaandam si Iloilo City Mayor Jerry Treñas sa tanan nga pumuluyo sang syudad sang Iloilo nga indi na mag-intra sa pag-invest sa Chiyuto Creative Wealth Document Facilitation Services OPC nga kilala man bilang Chiyuto Double Your Money Scheme, kag ginapadalagan ni Patrocenio C. Chiyuto.
Sa interview sang Bombo Radyo kay Treñas, iya ginpahayag nga nakalab-ot na sa iya ang kumpirmasyon sang Securities and Exchange Commission (SEC) nga iligal ang operasyon sang Chiyuto Double Your Money Scheme.
Suno kay Treñas, padayon niya nga ginapa-imbestigaran sa Iloilo City Police Office kag National Bureau of Investigation (NBI) Region VI agud mapasiguro nga indi na mag-intra ang mga pumuluyo sa ginapahayag iligal nga investment scheme sang Chiyuto.
Nagpanugyan naman ang alkalde sa publiko nga mangin mabinantayon kag maghalong bangud indi lahog ang madulaan sang kwarta kun mabiktima sang isa ka scam.
Matandaan nga sa opisyal nga kumpirmasyon nagikan sa Securities and Exchange Commission (SEC), nasaad nga wala nakahatag ang Chiyuto Creative Wealth Document Facilitation Services OPC sang Certificate of Registration bilang registered Associated Person, Compliance Officer, Salesman and/or Certified Investment Solicitor of a Broker Dealer in Securities Investment, Investment House, Underwriter of Securities, Investment Company Adviser kag Mutual Fund Distributor.
