𝗜𝗟𝗢𝗜𝗟𝗢 𝗖𝗜𝗧𝗬 —Nagpaathag si Iloilo City Mayor Jerry Treñas kaangot sa ginabayad sini sa Facebook agud ma-boost ang iya nga mga posts sa amo nga social media platform.
Sa interview sang Bombo Radyo kay Treñas, iya ginpahayag nga personal nga pondo sini ang iya ginagasto agud nga matigayon nga ma-boost ang mga posts sa iya facebook page.
Suno kay Treñas, ang period sang boosting sang iya post nagsugod sang 2021, 2022, 2023, tubtob subong nga 2024, kon sa diin, kon i-divide ang isa ka milyon nga nagasto, P200,000 lamang sa isa ka tuig.
Gin-athag man sini nga wala siya sang trolls sa social media kag lunsay matuod-matuod nga tawo ang yara sa likod sang iya nga mga postings, kon sa diin, gintawag pa sini nga “organic”.
Gintumod man sang alkalde nga naghibalo-an sini kon sin-o ang may mga trolls ilabi na ang mga nagapang-atake batok sa iya.
Ginpatpat man sang natungdan nga lunsay mga pagpasidungog sa syudad ang ginapa-boost sini sa facebook agud nga mas madamo pa ang ma-engganyo nga magpadulong sa city of love nga Iloilo City.
