ILOILO CITY – Gilayon nga nagpaguwa sang Executive Order si Iloilo City Mayor Jerry Treñas may kaangtanan sa pagpaidalom sa lockdown sa bug-os nga talatapan sang Bureau of Fire Protection Region 6 matapos nga nagpositibo sa Coronavirus Disease 2019 (COVID-19).
Sa interview sang Bombo Radyo kay Treñas, iya ginpahayag nga ang lockdown ang epektibo Hunyo 15 kag magalawig tubtub Hunyo 18 kun sa diin ginadumili-an ang mga personnel nga magguwa kag kinahanglan man nila nga magpaidalom sa Swab Test.
Kadungan sini, wala man napunggan sang alkalde nga magpabutyag sang pagkadismaya bangud wala niya nahibalu-an kun ano ang proseso sang pag-quarantine sa nasambit nga personnel.
Sa subong, padayon ang contact tracing agud mahibalu-an kun sanday sin-o ang naka-angkon sang close contact sa nasambit nga pasyente.
Kadungan sini, nagpaguwa man sang mga Executive Order ang alkalde nga nagamandu sa tagsa ka barangay council nga magpatigayon sang istrikto nga quarantine protocol kag ang mandatory contact tracing sa tion nga may magpositibo nga Locally Stranded Individual ukon repatriated Overseas Filipino Workers.
Kadungan sini, nagpaguwa man sang Executive Order ang alkalde tuhoy sa curfew hours kag liquor ban sa syudad sang Iloilo.
Sa pagpaathag ni Treñas, sa baylo nga 10 sa gab-i tubtub 4:00 sa kaagahon, 12 na sa tungang gab-i tubtub 3:00 sa kaagahon ang curfew hours.
May kaangtanan naman sa liquor ban, mahimo na nga makabaligya, makabakal kag maka-transport sang liquor products paglampas sang 8:00 sa gab-i.
