Nagpabutyag sang kasubo si Mayor Raisa Treñas matapos ang sunod-sunod nga kaso sang gin-abandona nga mga lapsag sa Iloilo City, kag nagpahanumdom sa mga ginikanan nga may yara sang mga programa ang siyudad nga pwede nila madangpan antes magpadayon sa desisyon.
Suno kay Mayor Treñas, bilang isa ka iloy kag bilang iloy sang siyudad, ginbatyag gid niya ang kasubo sang balita nga tatlo na ka lapsag ang nakita nga ginbiyaan sa nagkalain-lain nga lugar sa Iloilo City sa nagligad nga semana.
Ginpanawagan niya nga dapat magapangibabaw ang responsibilidad sang ginikanan sa tunga sang kabudlayan.
Ginpahayag man sang alkalde nga kung nagsala man ukon may natabo nga unexpected pregnancy, indi dapat idalahig ang kabataan nga wala sang sala.
Suno sa iya, ang mga bata amo ang mga anghel naton, anghel sang pamilya, sang komunidad, kag sang kahimtangan sang buas-damlag.
Ginpaathag man sang alkalde nga may yara sang mga social welfare programs ang Iloilo City Government nga andam magbulig sa mga iloy nga naga-antus sa mabudlay nga sitwasyon.
Kabay pa, suno kay Treñas, nga ini na ang katapusan nga balita angut sa ginpabay-an nga mga lapsag.
