ILOILO CITY – Nagapangabay si Iloilo City Mayor Jerry Treñas sa tanan nga mangin responsable sa pagtipon kag paghaboy sang basura sa basurahan.
Ini ang kasunod sang paglinapta sang basura sa palibot sang syudad matapos ang Opening Salvo sang Dinagyang Festival 2020.
Sa interview sang Bombo Radyo kay Treñas, iya ginpahayag nga kun tani, mapabilin ang katinlo sang syudad pagkatapos sang aktibidad ukon programa.
Suno kay Treñas, may yara na sang disenyo ang garbage bin nga pagabaklon sang Iloilo City Government agud nga ipahamtang sa palibot sang syudad.
Ginpahayag sang alkalde nga may kaangtanan sa nagahilapit nga Dinagyang Highlights sa Enero 25-26, nagakadapat nga ipakita kag ipabatyag sang mga Ilonggo ang mainit nga pag abi-abi sa mga bisita nga magasaksi sa Dinagyang Festival.
Lauman suno sa natungdan nga may yara sang surpresa nga patigayunon sa Dinagyang festival agud nga wala sang lull ukon boring moments.
Samtang, pasado 8:00 subong nga gab-i sang nabuksan ang tanan nga dalan sa palibot sang City Proper area.
Sa interview sang Bombo Radyo kay Jeck Conlu, pinuno sang Public Safety and Transportation Management Office, iya ginpahayag nga ginhulat nga matapos ang performance sang tagsa ka tribu kag ang pagsinaot sang mga tumalan-aw antes ginbuksan ang mga mayor nga dalanon sa syudad.
Sa pangkabug-usan suno kay Conlu, nangin matalunsay ang pagpatigayon sang Opening Salvo apang indi man malikawan nga may gamay nga problema.
