Matapos ang madinalag-on nga operasyon sang kapulisan sa pagdakop sang suspek nga nanghold-up sa SM City Iloilo sa Mandurriao, ginpabutyag ni Mayor Raisa Treñas ang iya pasalamat kag suporta paagi sa personal nga pagbisita sa ICPO kag paghatag sang padya sa mga otoridad nga nagresolba sang insidente.
Sa interview sang Bombo Radyo kay Joy Fantilaga-Gorzal, tagpamaba ni Mayor Treñas, ginpahayag niya nga nagapasalamat gid ang alkalde sa kapulisan kag mga operating groups nga nangin epektibo sa pag-pin down sang suspek.
Suno sa iya, dako gid nga bulig ang mga CCTV nga nahamtang sa SM parking area, nga nakabulig sa pagmonitor sang aktibidad sang suspek.
Ginpahanumdom man ni Fantilaga-Gorzal ang mga private sectors nga i-review ang ila security plans kag CCTV systems, bangud may yara sang existing ordinance nga nagamando sang pagpahamtang sang CCTV indi lang sa sulod sang establisemento kundi pati sa sawga ukon palibot sang lugar, kag dapat ‘high resolution’ ini.
Gin-anunsyo man nga may P50,000 nga reward para sa kapulisan ukon mga tawo nga nagbulig sa pagresolba sang insidente, bilang pagkilala sa ila serbisyo kag agud ma ‘boost’ ang morale sang mga otoridad.
Matandaan nga kagab-i, nagpadulong si Mayor Treñas sa opisina ni Iloilo City Police Office Director PCol. Kim Legada kadungan sang pagkadakop sa suspek nga naghold-up kay Dr. Lulu Salinas sa SM City Iloilo car park kag nadakpan ang suspek sa Bo. Obrero, Lapuz.
Ginpakita sang alkalde ang iya suporta sa kapulisan paagi sa personal nga presensya kag pagpakig-angut sa mga nagpatigayon sang operasyon kag ginpabutyag man nga importante ang koordinasyon sa tunga sang city government kag mga otoridad agud mapabaskog pa ang seguridad sa syudad.
