ILOILO CITY – Ginpasalamatan sang Iloilo City Government ang National kag Regional Inter-Agency Task Force sa pagpataas sang quarantine classification sang syudad sang Iloilo. Umpisa subong nga adlaw tubtob sa Oktubre 9, napaidalom sa modified enhanced community quarantine ukon MECQ ang syudad.
Sa interview sang Bombo Radyo kay Treñas, iya ginpahayag nga wala na sang choice ang local government unit kundi hingyuon ini nga mas mataas nga quarantine classification agud matapna ang COVID-19 cases kag ang local transmission.
“You know this is something that I do not exactly like. Kay bal-an ta nga kun may MECQ, apektado naman ang mga negosyo. Ang iban naton nga mga pumuluyo nga nagatrabaho, indi anay makaobra. But we have no choice.We based our decision on science and kun ano ang rekomendasyon sang COVID-19 team. Our COVID-19 team is composed of doctors kag iban pa nga upod sa City Hall. Waay gid kita choice, nagasaka ang kaso (sang COVID-19).”
Kadungan sang implementasyon sang MECQ, wala pa man nakahingyo ang syudad sang dugang nga augmentation force sang uniformed personnel agud mapatuman ang quarantine protocols apang istoryahan pa ini subong nga adlaw upod ang COVID-19 team.
Sa subong, magapabilin ang compliance officers sang syudad nga amo ang nagalibot agud ma-monitor ang mga pumuluyo sa mga kabaranggayan. #
