ILOILO CITY – Nagpatigayon sang random market visit si Iloilo City Mayor Jerry Treñas agud nga hibaluon ang mga kinahanglanon sang mga manugbaligya.
Sa interview sang Bombo Radyo kay Mr. Ariel Castañeda, pinuno sang Local Economic Enterprise Office, iya ginpahayag nga nag-una ang alkalde sa Iloilo Terminal Market kag Iloilo Central Market.
Suno kay Castañeda, antes pa man nagpungko bilang alkalde sang syudad, nagpatigayon sang pagsinapol si Mayor Treñas kaupod ang mga vendor association kag gilayon nga ginpaidalom sa validation ang tanan nga problema nga ginpalab-ot sang mga manugbaligya.
Ginpahayag ni Castañeda nga lakip sa mga gin validate amo ang kinahanglanon nga pondo para sa pagkaayo sang drainage system, atop, suga kag ang pagpabilin sang katinlo sa merkado.
Nagdugang man sang enforcers nga amo ang magapatuman sang Anti-Littering Ordinance.
Matapos ang random market visit sang alkalde, gilayon nga gin-umpisahan ang pagpinta kag pagkaayo sang guba nga porsyon sang mga nasambit nga merkado.
